Que jagan lo que quieran

Tito Sánchez
Revista Veleílo, nº 19
Junio 1998

El Álamo Que m'han dichu qu'en la plaza de la juenti, esa de los cuatru cañus de la puerta l'iglesia, qu'ahora paeci que mana, quierin arreglarla pa quearla mu bonita, pus jidin que van a poner una placa que jida "Aquí yaci el Álamu que nus dio sombra a t'ol pueblu cuandu veníamus a misa". Sobre to pa los que no entraban nunca.

Esi Álamu qu'en los días de Jarramplas tantus nabazus l'ha quitau al mesmu Jarramplas y a tos nujotrus tamien; esi Álamu, símbulu del pueblu, que salía hasta en las pegatinas de los cochis, qu'en tiempu de primavera se vestía de gala, llenándusi d'adornus en toas las suyas ramas, que parecía que se ponía el traji bonitu p'al tiempu de la comunionis, haciendu la competencia a tos los niños y niñas, desafiandu a ver quién se llevaba las mirás de la genti. Esi Álamu que su alta copa se vía en dende casi t'ol pueblu y, en dende cerca, t'ol espledor de su gordu troncu y sus abundantis ramas.

Y debiu a una terribli enfermedad terminó su ciclu de vida, d'esplendor, de belleza, de sombra, d'alegría. Ahora jará unus añus en que ya sin na que poder jacer, hubu qu'acabar cortandu sus grandis ramas por mieu a que algún día cayeran encima d'algún vecinu.

D.E.P. "El pueblu de Piornal no te olviará nunca"

Que jagan lo que quieran, que ya me da lo mesmu que lo mesmu me da, que de verlí asín comu està me da mucha pena el pobreditu, que paeci qu'está peloti, aunque entoavía mereci ser vistu y nunca quitau.

De toas las maneras lo peor de to estu y lo que más me dueli es que cuandu juerun a cortarli las ramas, allá pór los Carnavalis del 96, nos hablarun de los proyectus que tenían pensaus tos mu bonitus, pa jader con el troncu del Alamu. Que si vallarli y poner un jardin to alreor, barnizánduli pa que no se estropeara nunca y no perdiera la cachapa, que si jacer una cabina de telefunu dentru de él, que si una estauta... Yo que sé, muchas cosas, peru el tiempu ha iu pasandu y no s'a vistu na. L'únicu qu'han saliu unus retoñus peru na, el pobreditu ya no puei, es imposibli. Y aluegu tamién lo qu'ha pasau es que s'ha iu cayendu la corteza y es qu'el tiempu pasa y no vuelvi p'atrás.

Entoncis ¿aquí qué pasa que las autoridadis competentis no s'han preocupau en absolutu d'ellu? , ¿están esperandu a ver si esus retoñus son capacis de tirar p'alanti?, ¿están esperandu a que la genti del pueblu los digamus que jagan algu d'una vez con el troncu?. U es que ¿hablan antis de tiempu y sin saber de las cosas?

En fin, con estu lo que quería era concienciar al pueblu de qu'aún estamus a tiempu (esperu) de jader algu bonitu con lo que quea y me gustaría qu'escribiesiis a esta Revista, aunque sóló sea pa jidir "A mí me gustaría qu'hicieran algu bonitu" u "A mí me da igual", u "Pues yo prefietu que le cortin que ya quea mu feu". Sois libris de expresar la vuestra opinión, peru que no parezca que nos es indiferenti u que nos da igual, qu'aluegu algún día a lo mejor nos arrepentimus y después las palabras son totalmenti inútilis y están mu por demás si no las has jidiu a su debiu tiempu.

P.D.- Por ciertu, el pinu c'an colocau allí al lau quea preciosu, amus peru que te cagas de lo preciosu que quea.

Volver a El Álamo                     Ir a Más...

Carta Si quieres escribirme: victor@piornal.net                                                    Página inicial


© Víctor A. Díaz Calle. 1997-2002